Elkargotik beharrezkotzat jo dugu elkargokide guztiei beren eguneroko jardun profesionalean garrantzi berezia duen gai baten inguruko argibideak helaraztea. Zehazki, zenbait proiektu teknikoren izendapenari eta planteamenduari buruz ari gara; izan ere, askotan interpretazio murriztaileen menpe geratzen dira.
Zehazki, ELOren (LOE) 2.1.a) apartatuan aurreikusitako erabileretarako (administratiboa, sanitarioa, erlijiosoa, bizitegikoa bere modalitate guztietan, irakaskuntzakoa eta kulturala) diren lokalen barne-egokitzapeneko eta jarduera-proiektuen kasuan, eta baldin eta eraikinaren egiturari, bolumetriari edo konfigurazio arkitektonikoari eragiten ez badiote, ezta haren erabilera nagusia aldatzen ere, gomendatzen da proiektu horien izenburuan «Obrak» terminoa ez erabiltzea.
Horren ordez, izendapen egokia honako hau izango da: «...rako lokala egokitzeko eta instalazioen proiektua». Horrela, argi eta garbi adierazten da proiektuaren eduki nagusia instalazioei eta lokalaren barne-egokitzapenari lotuta dagoela.
Era berean, gogorarazi nahi dizuegu esku-hartze horiek ez diotela eragiten eraikinaren egiturari, bolumetriari edo konfigurazio arkitektonikoari, eta ez dutela haren erabilera nagusia aldatzen. Ondorioz, ez zaie ELO (LOE) aplikatzen. Horregatik, proposatutako izendapenaren helburua da aipatutako araudiarekin lotura okerrak saihestea, gure elkargokideentzat murrizketak edo interpretazio desegokiak eragin baititzakete.
Aurreko guztia kontuan hartuta, jarraibide hau aintzat hartu eta aplikatzeko eskatzen dizuegu, lan mota horien izendapenean irizpideak bateratzeko eta, horrela, lizentziak ukatzeko arriskua nahiz proiektuaren eta haren bisatuaren definizio desegoki baten ondorioz sor daitezkeen gorabehera administratibo edo judizialak saihesteko.
Halaber, proiektu mota hauei lotutako edozein gorabehera edo arazo Elkargoaren jakinaren gainean jartzeko eskatzen dizuegu, ahalik eta lasterren Kontseilu Nagusiari helaraz diezaiogun. Horren bidez, jarduketa koordinatua ahalbidetu eta lanbidearen interesen defentsa egokia hasieratik bertatik bermatu ahal izango da.